Bawngkawn AMC Sports Complex ah Phul lem

by News Editor

Tualchhung News

ZORAM TODAY| 17th April, 2026: Tukin khan Bawngkawn AMC Sports Complex-a phul lem phah bakah floodlight leh facilities siamnana sanction pe tura beisei mek Power Finance Corporation(PFC), Ministry of Power-a CSR programme enkawltu Chief General Manager Prabhakar Das leh Manager Suresh Kumar Naidu te chuan a hmunhma an rawn endik.

He Project atana DPR chu an endik tawh thu leh a that thu sawiin ataka a hmun rawn endik an nih thu an sawi. AMC leh Bawngkawn LC te hian he Field tichangtlunga inenkawl tawm turin MOU an ziak a. He Sports Complex hi tha zawka siam anih theihnan AMC leh NECS firm in agreement an ziak bawk niin kan thudawnna chuan a tarlang.

He agreement ang hian NECS in DPR te siamin sum a zawng ta a ni. Tuna rawt ang chuan phul lem tha chi phah a ni anga, floodlight 1300 Lux aia hniamlo dahin a bul vel tihchangtlun bakah a hmunin a zawh dan azirin sports discipline dangte tan infiamna hmun siam tel a ni ang. A project cost ₹. 1530 lakh chu appraisal tih hnuah sanction theiha recommend tawh nia hriat a ni.

Tukin zinga Brigate Field endik naah hian Pu Robert Romawia Royte, MLA; Pu Lalringliana, Ex-Dy Mayor, AMC EE, NECS Chairman leh GSA aiawhte an tel a ni.

He mi zawh hian Aizawl FC Complex, Lungleng-a phul lem field siam zawh thar chu PFC hotute hian an tlawh a. Tha taka sak zawh a nih avang leh PFC in sanction a pek bak hna tam tak Aizawl FC neituten anmahni sum senga an thawhbelh chu lawmawm an tih thu an sawi, niin kan thu dawnna chuan a tarlang. PFC hotute chuan Aizawl FC neitut'n Field puitling an duh avanga square metre 1800 zeta zau an siambelh chu an fak hle a ni.

PFC hotute hian Mizoram Governor Dr VK Singh a pawh Lok Bhavan-ah an tlawh a,Governor hian Bawngkawna AMC Sports Complex chu a ngaih pawimawh thu lo a lo hrilh bawk.